tradhisi sepasaran bayi ing kab. Grobogan

Tradisi Sepasaran Bayi di desa Sumurgede

Kec. Godong, kab. Grobogan

                Tradisi sepasaran bayi wonten ing desa Sumurgede, kecamatan Godong, kabupaten Grobogan menika nggadhahi ciri khas ingkang benten kaliyan daerah sanesipun. Acara menika dipun lampahaken dening keluarga ingkang nembe mawon gadhah putra, ateges acara menika namung dipun lampahaken kaliyan putra ingkang mbajeng mawon. Menawi adhik-adhikipun boten wajib dipun lampahaken. Acara menika dipun tindakaken nalika bayi umur sepasar utawi gangsal dinten (5). Pramila, acara kasebut dipun paring nama sepasaran, amargi dipun tindakaken nalika bayi umur sepasar. Acara menika dipun tindakaken wonten ing dalemipun tiyang sepuhipun bayi.

                Acara menika dipun tindakaken kanthi sederhana. Namung selametan sarta ngundang sanak sadulur kemawon. Acara dipun tindakaken wanci dalu, padatanipun sabibaring sholat isya’.  Acara menika kendurinan. Sabibaring kendurinan dipun lajengaken acara rasulan utawi ngethok rambutipun bayi. Bayi mau dipun gendhong dening ramanipun, lajeng simbahipun (bapak saking ibu bayi) mayungi bayi sarta bapakipun. Bayi kasebut dipun ubengaken sarta rambutipun bayi wau dipun kethok mawi gunting. Dipun sarengaken kaliyan maos shalawat nabi. Menika nggadhahi pasemon bilih bayi kasebut sageda dados putra-putri ingkang soleh/solekhah, ngabekti kaliyan tiyang sepuhipun sarta saged migunani kagem nusa, bangsa, lan agama. 

                Ingkang kapisanan ngethok menika kyai utawi sesepuh kampung, lajeng dipun lajengaken kaliyan tiyang sanesipun. Rambutipun bayi wau lajeng dipun pendhem dados satunggal kaliyan ari-arinipun. Sabibaring acara rasulan wau, para tamu saged kondur utawi dherek mirsani acara salajengipun. Inggih menika acara beksan “Angguk Karya Muda”. Tarian menika dipun tindakaken nalika sabibaring acara kenduri sarta acara rasulan.

                Tari angguk menika dipun paragakaken dening para pemuda, watawis kelas SMP utawi SMA. Pramila, tari menika dipun sebut angguk karya muda, ingkang gadhahi teges bilih tari menika jiwanipun para pemuda. Tari menika ngagem busana jangkep, topi, rompi, celana hotpen, sarta kipas ingkang dados alatipun.  Ingkang nari menika tiyang 12 ngantos 18 paraga. Tari menika nitikkaken gerakan tangan kaliyan kipas, sarta lenggak-lenggok badanipun ingkang seiring kaliyan astanipun. Tari menika dipun lampahaken nalika acara sepasaran bayi, khitanan, sarta acara penyambutan tamu ingkang wigati, kados ta wali kota, camat, bupati, lan sanes-sanesipun.